اهلا
قراءة ممتعة #قصة
حكاية اليوم
يا هارب من الغولة يا طايح في سلال القلوب.
كان فيه مرأة ماتحبش الموت وتخاف من الجبانة لأنها سامعة أن اللي يموت تطلع غولته وهيا تخاف من الغولة
وبعد سنين مرض راجلها وتوفى، داروا عزاه و دفنوه وحتى الزيارة ماعاد زاراته ما تحبش تشوف القبور خايفة تطلعلها غولته، وكل ماتسمع بحد مريض ولا توفى ترعش وتخاف حتى العزي تمشي بالسيف تخاف من ذكر الغولة وتعقدت من الموت ومن الجبانة وبدت تحلم وتتخايل في روحها حتى هيا لما تموت ويدفنوها بتطلع غولتها ولا تتخيل وليدها كان توفى كيف تتصرف لو تخرج غولته وقالت في نفسها نمشي ندور بلاد مافيهاش لا جبانة ولا غولة
وبدت تنشد اللي جاي واللي مسافر بالاك سامعين ببلاد مافيهاش جبانة ومايطلعوش فيها الغولة نمشيلها ونعيش فيها وكل واحد يقلها كلام حتى واحد قلها في بلاد بعيدة يعيشو فيها عرب يم يم ماعندهمش جبانة يدفنوا فيها،
وفي ليلة بلا قمر طبت ولدها ومايلزمها وتسقدت لعرب يم يم ومشات وبقات تسال على الطريق ووين مايلحق الليل تبات لغاية ماوصلت لهديكة البلاد
واختلطت بناسها وعاشت بينهم ومروا سنين وهداكة وليدها كبر ولا راجل وزوجاته ببنية من بنيات عرب يم يم وفاتوا سنين ومروا وكنتها فرحتها بوليد وهيا كبرت في السن وحفيدها كمل العامين، وفي يوم من الايام وليدها قالها يااميمتي اني مسافر في تجارة وممكن نطول حتى شهر ردي بالك من روحك وراهب معاك كنتك وحفيدك يونسوك حتى نرجع،قالته ماعليش يا وليدي ،انتبه لحالك وطريق الخير
وسافر الولد وهي قعدت مع كنتها وحفيدها يتونسو مع بعض، وفي يوم مع الصباح جتها كنتها قتلها نوضي ياعمتي خير اليوم راكي جولتي في النوم وما نضتيش؟ نوضي افطري معاي !! قالتلها
اني اليوم نحس في روحي مريضة وراسي يوجع فيا وما خاطريش في شئ..تعجبت الكنه وقالتلها شن يوجع فيك؟ قالت العجوزة على حسن نية راسي يوجع فيا هد!!!! .
مشت الكنه تجري لاماليها وقالتلهم ارواحوا اليوم فيها زردة.
قالولها شن فيه قالتلهم عزوزي راسها يوجع فيها..
التموا اماليها واقاربها ويصفقوا فرحانين العحوزة ياناري حارت جايين ينشدوا و يصفقوا فرحانين !!!كيف؟!!
قالولها احني من عاداتنا اللي يمرض ندبحوه و نتلموا نديروا عليه زردة وناكلوه!!
بكت العجوزة وخبطت وقتلهم مافيا شيء !!مافيش فايدة ماحبوش يسمعوا كلامها ..
بعدها قالت اااااه درك عرفت علاش بلادهم مافيهاش جبانة وانا عندي ليا سنين معاهم وماسالتهمش وين يدفنوا في موتاهم؟ وهما اللي يمرض يذبحوه وياكلوه مايذفنوش فيه.
ولما تلاقوا عليها وجوها يذبحوها قالتلهم خلوا وليدي لين يروح ونشوفه قالولها لا !!! قتلهم باهي خلوله حتى هو ماياكل، خلوله من كل حويجة طريف!! شوية من الرية وشوية من الكبدة وشوية من الراس وشوية من كل شي ..
قالولها باهي وذبحوها ودسوا من كل حاجة طريف لوليدها وكلوها!!!
وبعد شهر رجع ولدها..قال لمرته وين امي مش باينة؟
قتله امك مرضت قريب ماتت علينا لحقنا عليها تلحيق بالموس لكن ماتخافش خلينالك حصتك من كل حويجة طريف ومشت جابتهوله
شافها رعش ودار روحه عادي وهيا تحسابه حتى هو من عرب يم يم زيهم وقالها والو واستنى حتى ليل الليل وهز ولده وهرب بيه يرجع لبلاده،
بلاده بعيدة والمسافة طويلة يمشي ويرتاح والماكلة عليه تمت وقال خلي نحط ولدي علي كتافي ونخفف سرعتي باش نوصل فيسع ونلقوا ماناكلوا ….
مشي مشي وهداكة الولد جاع وينقز علي ودن بوه وياكلها !!عيط الراجل وخدي هداكة الوليد اللي طالع حتى هو لخواله من عرب يم يم وحذفه في الوادي وقال حتى انا مالقيت ماندير جايب معاي عرب يم يم،
ورجع لبلاده بروحه وتزوج بنت من بلاده ولي يسأله عن أحواله وعن أمه يقوله
( يا هارب من الغولة يا طايح في سلال القلوب )
وهاذي قصة المثل
و مشيت عليهم و خليتهم بوذني ما سمعتهم و بعيني ما ريتهم
ليلتكم سعيدة واحلامكم اسعد وتصبحون على واقع اجمل باذن الرحمن الرحيم