حكاية السلطان و التفاحة

اهلا

حكايةالسلطان_والتفاحة_
بسم الله بديت وعلى النبي صليت . وبالمسك والعنبر حبابي رشيت
كان يا مكان في وقت بعيد سلطان يحب الزرع والاشجار اهداولو زريعة من بلاد بعيدة …..جاب الفلاحين تاع المملكة وسقساهم واش هذي الزريعة واحد ماعرفهاش عرفوها تاع فاكيه بصح واش من فاكيه الله اعلم ….دار السلطان براح في مملكتو وقالو قول لي يزرع الزريعه هاذي او تكبر واتجيب غلتها يعطيه السلطان واش يطلب ولازم فلاح شاطر ومولا خبرا باه الزريعة ماتموتش ولا يقطع راسو ……واحد من الفلاحين ماقدر ايغامر بحياتو قاع كانو متمنين يغناو ويعيشو عند السلطان بصح لوكان تموت الزريعه راسهم يتقطع سماح محبوش …….كان واحد الشيخ كبير فلاح ومسكين قليل الحال غير هو وعجوزو ….راح ليها وقاللها علاه هذي ليام لي بقاتلنا ما نعيشوهاش في القصر ناكلو ونشربو الخيرات خير من رانا على اخر ايامنا قاعدين للشر والميزيرية ويا من حيانا حتان تنبت بلاك نموتو قبل المهم تمتعنا وعشنا يامات …قاتلو لعجوز ماعندي مانقول لي درتها راني معاك……
راح الشيخ للقصر او قابل لسلطان وقالو انا نغرس الزريعه ..قالو السلطان وراك متأكد وقابل بالشرط ؟؟؟ قالو الشيخ ايه قابل…قال السلطان للوزير اديه للجنان واجهزولو الدار لي فيه بكل الخيرات والماكله كل يوم اتروحلو واعطوه الزريعه باه يغرسها ……وكما كان الحال سكن داك الشيخ مع عجوزتو في لجنان وعاد الخير كل يوم يجيهم من القصر فاكيه واللحم ومواكل ودجاج خيرات كبيرا …واتوكل على ربي هداك الشيخ وبدا يحرث في الارض وينظف فيها ومن بعد اغرس الزريعه وتهلا فيها وكان يبات عساس عليها لا ياكلوها زواوش ولا تاكلها الفيران ….بداو ايبانو دوك الشجرات وفاتو شهور زادو شدو رواحهم وفرح الشيخ بيهم كثر من السلطان …فاتو عليهم تقريب عام بشرو الشجرات وفرح الشيخ و زاد هتم بيهم او عسهم كثر لقاهم خرجو تفاح ريحتهم تقول مسك😋 الحبات يكبرو بالزياده على التفاح العادي عاد خايف عليهم ويرقد قدامهم لا يجي كاش واحد ينحيهم وياكلهم ولا يجي الزاوش ينبشهم ولا الدود يسكنهم ….طابت التفاحة الأولى طار بيها يجري للسلطان اول ماشافها السلطان فرح بصح الوزير خاف وحسد ذاك الشيخ وقال في قلبو درك يطلب واش بقى والسلطان ينفذهالو وماشكيتش حاب دارهم برك راه طامع يكون وزير في بلاصتي والسلطان لازم يقبل على حساب الشرط …سكت شوي وقال للسلطان ياسيدي رد بالك ماتلعبش بحايتك !!قالو السلطان علاه ؟!….قال الوزير التفاحة جايا من بعيد وحنا وين علابالنا واش ناوين ليك وانا راه قلبي نازغني من التفاحه خلي ندوها للطبيب يشوفا بلاك فيها ضر ولا حاجة شينا وين اعلابالنا حنا والا مافيهاش كولها بالصحة والعافيه …قال السلطان صح وعندك الحق وين علابالنا مزيا لي راك معايا وزير ..رفد الوزير التفاحه وداها للطبيب وعطاه 500دينار وقالو دخل فيها ابرا تاع سم قاوي ولي يذوق نتشه يموت تم تم …وكما كان الحال والطبيب دار كيما قالو الوزير رفدها الوزير وداها للسلطان وقالو ياسيدي راه طبيب شافها و حللها والقاها ضارا ولي ينتش منها نتشه صغيرة على ارضو يموت ….قالو السلطان راك متاكد ياوزير قالو انعم سيدي …قالو خلينا نجربوها جيبولي واحد من لي حاكمين عليهم بالموت….جابو واحد من الحبس عطاوه نتشه من التفاحه طاح على ارضو مات 😮 قال الوزير شفت ياسيدي راح لمان مكانش …السلطان قال الشيخ كان ناويلي الموت لازم غدوى يتشنق هو وعجوزتو علابيها قبل الشرط راه متفاهم معاهم باه يقتلوني ….سمع الشيخ الحراس يحكو في الجنان بلي غدوى يدوه للساحة باه يشنقوه هو وعجوزتو راح يجري ليها وقالها التفاحه جات مسمومه والسلطان حكم علينا بالشنق وسط الساحه….قاتلو على آخر عمرنا نتشنقو والناس تتفرج الشامت اكثر من لي يحبنا 😓هات ناكلو من التفاح ونتسمو ونموتو خير من الشنق والكشفه وسط الناس …راح الشيباني جاب تفاحتين وتوضاو وصلاو وطلبو ربي يسامحهم على قتل الروح وتمدو قدام بعضاهم وكلاو التفاح ورقدو …..طلع الصباح ومع حل الشيباني عينو ويشوف في فراش عجوزتو يلقى بنت عدرا تهبل مغطيها الشعر والعينين تاع ريم تخلع ولا يستغفر 🤗حلت لعجوز عينيها لقات في فراش شايبها شاب الله مصلي على النبي عليه ☺ قاتلو يابني الشيباني لي كان هنا وينو ؟!ولا خلاص ديتوه !!!
قالها يابنتي انت ماشفتيش عجوزا كانت على لفراش لي كنتي راقدة فيه ؟! وهما هكذاك باهتين في بعضاهم حتى تحل عليهم الباب ودخلو الحراس باش يدوهم للساحة …وغير دخلو لقاو بنت ومعاها شاب والشيباني ولعجوز مكانش حوسو كامل في الدار والو مالقاوهمش ..قالو واحد فيهم درك كيفاه نديرو السلطان خلانا نعسو فيهم وصباح نجيبوهم درك واش نقولولو ؟!قالو لاخر حنا ماعدنا مادخلنا ندولو هادو ويدبر راسو ….داوهم للسلطان وقالولو ياسيدي الشيخ ولعجوز هربو والقينا في بلاصتهم هادو ……قالهم السلطان انتوما ا
شكون او واش قصتكم تاني او وين راهم الشيخ ولعجوز ؟؟! نطق هداك الشباب ياسيدي انا هو الشيباني وهذي هي عجوزتي ….قالو السلطان تتمسخ بيا !!قالو حاشا سيدي درك نحكيلك قالو قلنا حنا ميتين ميتين والتفاح مسموم ولي ياكلو يموت ناكلو منو ونموتو بالسم خير من المشنقه والناس تتفرج ..رقدنا والصباح لقينا رواحنا كما راك تشوف وانا ماعرفت عجوزتي ولا هي عرفتني …قال السلطان كاين سر ولازم نعرفو ؟!!
الوزير كان معاهم وكل ماكان الشيباني يحكي ايوخر هو بخطوا بالخطوا حتان قرب للباب …شافو السلطان قالو كما راك ماتتحركش وين رايح ؟؟!وقالهم روحو جيبولي شيباني في التسعين من لبلاد وجيبولي تفاحه من لجنان …وكما كان الحال جابولو واش طلب وقال لشيباني هاك كول من هذي التفاحه ..قالو داك الشيباني باه ناكلها سنا وحدة ماعنديش قالهم السلطان هاتو مهراس وقدامي هرسولو التفاحه وعطوه ياكلها 😁 عطاوه التفاحه كلاها وفرشولو قدام السلطان رقد وجا الليل وبدا الوزير يتسلبت باه يهرب ويفيقلو السلطان ويحكمو قالو الليله كامل نباتو مجمولين وفي بيت وحده واحد ماهو خارج وزاد وصا كبير الحراس يشدد العسا على جماعه كامل …طلع صباح وحلو عينيهم طول على داك الشيباني مول التسعين لقاوه رجع شاب وبصحتو …وتم عرف السلطان سر التفاح قال للوزير واش تقول درك ..ولا كفاه تبرر هذي الحاجه …..قالو ياسيدي انا لي دبرت وخططت وعطيت للطبيب دراهم باه يدير في التفاحه السم …كنت خايف دير الشيخ وزير وانا تبعدني ….قالو السلطان امالا لي خفت منها اليوم تصرا ويا حافر حفرا لخوه ايطيح فيها ..ودار السلطان لداك الشيباني لغرس التفاح ولي عاد صغير او وزير وقالو احكم انت واش ادير للوزير وطبيب ؟! وكان اول حكم لشيخ وحكم عليهم بالشنق وسط الناس …وقال السلطان للوزير الجديد جيبلي تفاحه ليا وتفاحه للسلطانة 🥰ودير حراسه كبيرة على لجنان لا نلقاو قاع مملكة تتڨمط 🤣 😂وهنا كملت حكايتتا لليوم وربي يهنيكم و يرزقكم الصحة والعافيه ويطيب عشرتكم ويهني بالكم ويكبر جمعتكم😘😘😘